الرئيس يخاطب شعبه الحبيب
يا شعبى يا روحى يا حبيبى يا حاطك فى جيبى يا ابن الحلال
يا شعبى يا شاطر يا جابر خواطر يا ساكن مقابر وصابر وعال
يا واكل سمومك يا بايع هدومك يا حامل همومك وشايل جبال
يا شعبى اللى نايم وسارح وهايم وفى الفقر عايم وحالة دا حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشى امورك كدة باتكال
واحب اللى ينصب واحب اللى يكدب واحب اللى ينهب ويسرق تلال
واحب الللى شايف وعارف وخايف وبالع لسانة وكاتم ما قال
واحب اللى قافل عيونة المغفل واحب البهايم واحب البغال
واحب اللى راضى واحب اللى فاضى واحب اللى عايز يربى العيال
واحب اللى يائس واحب اللى بائس واحب اللى محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان ماتش كورة وفيلم ومقال
واحبك تأيد تعضد تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغللى مخك وتفتح جدال
وتبدأ تشاكل وتعمل وتنكش مسائل وتسأل سؤال
وعايز تنور وعايز تطور وتعمللى روحك مفرد رجال
ساعتها هاجيبك..لا يمكن اسيبك وراح تبقى عبرة وتصبح مثال
هابهدل جنابك واذل اللى جابك وهيكون عذابك دا فوق الاحتمال
وامرمط سعادتك واهزأسيادتك واخللى كرامتك فى حالة هزال
وتلبس قضية وتصبح رزية وباقى حياتك تعيش فى انعزال
هتقبل هاحبك..هترفض هلبك هتطلع هتنزل هاجيبلك جمااااااااااال
No comments:
Post a Comment